□ 罗建华

　　(一)

　　走上台来鞠个躬，问候各位朋友们。

　　不唱戏也不唱歌，先来讲段顺口溜。

　　不讲汽车不讲房，只讲家乡柳叶塘。

　　柳叶塘好地方，山青水秀茶叶香。

　　小塘里照见月亮，大河里看见天上。

　　洋咪咪满天飞舞，蝉亮子树上把歌唱。

　　细伢子圳里捉鱼虾，堂客们洗衣打水仗。

　　邻里和睦好相处，大男细女乐洋洋。

　　(二)

　　哪个脑壳进了水，后山毁林开石矿。

　　河里来了挖土机，绿草河滩挖砂坑。

　　树砍净，草死光，小溪断水天泛黄。

　　晴天尘扬灰舞，下雨满地泥浆。

　　天光灭黑听炮响，嗲嗲娭毑睡不香。

　　堂客们出门衣遮脸，细伢子上学走泥沆。

　　听不见蝉亮子把歌唱，洋咪咪一去不还乡。

　　黑起良心开石矿，怪不得邻舍想骂娘。

　　(三)

　　县委政府新举措，环保建设推进忙。

　　美丽乡村建设好，还林先关非煤矿。

　　疏通河道还绿水，坚决取缔砂石场。

　　绿色庭院家家建，栽花养草修广场。

　　柏油马路村里转，门前屋后桂花香。

　　堂客们跳起广场舞，嗲嗲进了健身房。

　　细伢子用心把书读，都想考个好学堂。

　　天蓝水绿人心爽，绿水青山柳叶塘。

　　(《绿水青山柳叶塘》是一段快板，或叫长沙快板，一般七字一句，有节奏，押韵，但也可有些变化，总之每字都要读在板上。用宁乡话写的快板，乡间又叫莲花闹。)